Ny dagleg leiar for Skjærgårdstjenesten

Erling Skaatun Gausdal kjem frå stillinga som driftsleiar i Mowi ASA, der han har hatt ansvar for dagleg drift av matfiskanlegg med fokus på produksjon, økonomi, HMS og leiing av operative team. Han har også brei erfaring frå havbruk, teknisk drift og vedlikehald av båtar og anlegg.

– Vi er svært glade for å få Erling med på laget. Han har ein solid bakgrunn frå sjø- og havbruksnæringa, er ein praktisk og løysingsorientert leiar og har erfaring med både teknisk drift og teamleiing. Dette er kompetanse som er svært relevant for arbeidet i Skjærgårdstjenesten, seier Hans Edvard Pilskog, dagleg leiar i Sunnmøre friluftsråd.

Gausdal har god erfaring med bruk av arbeidsbåt, sjøoperasjonar og kjenner kysten i fylket godt.

– Eg ser veldig fram til å ta fatt på arbeidet i Skjærgårdstjenesten. Vi har Noregs finaste kyststrekning, og eg ønskjer å bidra til at fleire får oppleve ho. Å få jobbe ute i skjergarden, for allmenta og med tiltak som gir betre folkehelse og gode naturopplevingar er ein stor motivasjon for meg, seier Gausdal.

Han tiltrer stillinga 1. oktober 2026.

Skjærgårdstjenesten i Møre og Romsdal arbeider med drift, skjøtsel og tilrettelegging av kystnære friluftsområde. Tenesta utfører mellom anna vedlikehald, renovasjon, og praktiske tiltak i skjergarden. Dei gjer ein svært viktig innsats for å utvikle og leggje til rette for trygge og attraktive sjønære friluftsområde til glede for allmenta.