Padlekurs for ungdom!
Friluftsrådet arrangerer fleire kajakkurs for ungdom i sommarferien 2025! Vi startar med introduksjonskurs på Grodås i juni og avsluttar med kjekke padlecampar med overnatting på Kjeldsund i august!
- Friluftsrådet
- Padlekurs for ungdom!
Kajakk er ein unik måte å oppleve kyst og vatn på, og gir raskt meistringsglede og vil for mange vere ein kjekk aktivitet ein kan halde på med heile livet.
Friluftsrådet tilbyr padleopplæring som er tilpassa ungdom. Det er leik, moro og læring i trygge rammer med dyktige rettleiarar som er aktivitetsleiarar i Padleforbundet.
Vårt mål er at flest mogleg ungdommar skal få oppleve «padleglede». Ved gjennomført introduksjonskurs eller grunnkurs får ungdommane våttkort, som dei kan vise for å få låne kajakk til dømes med Bua-ordningane.
Introduksjonskurs for deg som vil prøve kajakk
På introduksjonskurs vil du få litt grunnleggande opplæring om kajakken, med litt tips og triks for å kunne oppleve meir meistringsglede.
Introduksjonskursa passar best for deg som vil prøve og teste ut om kajakkpadling kan vere ein aktivitet som du synest er kjekt å halde på med.
Påmelding her:
Dagskurs kr 150.-
- Laurdag 21.juni - introduksjonskurs - Grodås/Hornindal (13-16 år)
- Søndag 22.juni - introduksjonskurs - Grodås/Hornindal (13-16 år)
Padlecamp med introduksjonskurs kr 400.-
Grunnkurs som padlecamp - for deg som vil lære meir
På grunnkurset lærer ungdommane meir om padleteknikkar, turplanlegging, vêr, farvatn og forhold og ikkje minst redningsteknikkar for å kunne redde seg sjølv og andre dersom ein skulle vere uheldig.
Ein kan vere med på grunnkurset utan å ha tatt introduksjonskurset først.
Dei fleste grunnkurs vert oftast arrangert over to lange dagar (a 8 timar), og det kan vere litt tøft og slitsamt om ein ikkje er van med kajakk frå før.
Friluftsrådet sin padlecamp for ungdom er eit grunnkurs går over tre-fire dagar slik at vi får fleire og litt kortare dagar i kajakk, noko som gir ungdommane meir overskot til leik og læring.
Påmelding grunnkurs: Padlecamp i Kjeldsund 12.-14.august
Teknikkurs som padlecamp - for deg som vil utvikle deg enda meir
På teknikkurset får ungdommane finpusse padleteknikkar dei lærte på grunnkurset. Men også nokre nye teknikkar som gir større kontroll og gir fleire moglegheiter i kajakken. Noko som ofte gir enda større meistringsglede.
Ein må ha gått grunnkurs før ein kan delta på teknikkurs. Og ein vil få størst utbytte av teknikkurset om ein har fått padla litt etter eit grunnkurs.
Dei fleste teknikkurs vert i regelen arrangert over to lange dagar (a 8 timar).
Friluftsrådet sin padlecamp for ungdom er eit teknikkurs som går over tre-fire dagar slik at vi får fleire og litt kortare dagar i kajakk, noko som gir ungdommane meir tid til å øve på og meistre sjølve padleteknikkane. Det gir og meir tid til leik og moro.
Påmelding teknikkurs: Padlecamp i Kjeldsund 5.-7.august
