Padlefestival UNG
Kvar sommar arrangerer Sunnmøre friluftsråd padlefestival for ungdom i alderen 14–17 år. Bli med på kajakkurs og turar på ulike stadar på Sunnmøre!
- Friluftsrådet
- Aktivitetstilbod
- Padlefestival UNG
Kajakk er ein unik måte å oppleve kyst og vatn på, og gir raskt meistringsglede og vil for mange vere ein kjekk aktivitet ein kan halde på med heile livet.
Friluftsrådet tilbyr padleopplæring som er spesialtilpassa ungdom. Det er leik, moro og læring i trygge rammer med dyktige rettleiarar som er aktivitetsleiarar i Padleforbundet.
Vårt mål er at flest mogleg ungdommar skal få oppleve «padleglede». Ved gjennomført introduksjonskurs eller grunnkurs får ungdommane våttkort, som dei kan vise for å få låne kajakk til dømes med Bua-ordningane.
Introduksjonskurs - for deg som vil prøve kajakk
På introduksjonskurs vil du få litt grunnleggande opplæring om kajakken, med litt tips og triks for å kunne oppleve meir meistringsglede.
Introduksjonskursa passar best for deg som vil prøve og teste ut om kajakkpadling kan vere ein aktivitet som du synest er kjekt å halde på med.
Kursa går over 3 timar med to rettleiarar frå friluftsrådet.
Grunnkurs - for deg som vil lære meir
På grunnkurset lærer ungdommane mellom anna om ulike farvatn, vêr, padleteknikkar, turplanlegging og ikkje minst redningsteknikkar for å kunne redde seg sjølv og andre dersom ein skulle vere uheldig.
Ein kan vere med på grunnkurset utan å ha tatt introduksjonskurset først.
Padlefestivalen sitt grunnkurs går over tre-fire dagar slik at vi får fleire og litt kortare dagar i kajakk, noko som gir ungdommane meir overskot til leik og læring.
Dei fleste grunnkurs vert oftast arrangert over to lange dagar (a 8 timar), og det kan vere litt tøft og slitsamt om ein ikkje er van med kajakk frå før.
Prisar
Introduksjonskurs kostar kr 150
I 2024 vert grunnkurset gjennomført som ein padlecamp med overnatting og kostar då kr 500.-
Betaling skjer ved påmelding.
Friluftsrådet finansierer mykje av Padlefestival UNG gjennom tippemidlar til aktivitet for barn og unge.
Dette treng du av utstyr
Du treng våt- eller tørrdrakt. Ta med tørt skift i vanntette posar til å ta med i kajakken, samt mat og drikke. Har du ikkje eigen våtdrakt eller tørrdrakt er det mange utstyrsbasar i regionen har utstyr til gratis utlån - sjekk her for oversikt
Du får låne kajakk, åre, spruttrekk og vest med Sunnmøre friluftsråd.
Utfyllande informasjon og pakkeliste blir sendt til påmeldte.